.
.
تعالي ,,
تعالي ,,
ناديتك وما جيتي
يظهر إنك نسيتي
ساعتك على نفس الرصيف
وراح الوقت ونسيكي في دروب حلمي
تنثرين عمرك وتركضين لآخر جروحي
وبين جرحك وجرحي أكتبك ذكرى
حرفها من حبر النزيف
كلمتين مثل غلا روحي
روحي ,, حاولي ما ترجعين
ما بقى بالعمر باقي
جفت عروقي وجفت قربة الساقي
وأنا باقي بسوق الشوق
باسط بأشواقي
يا من يشتري عشق وشعر وليل
وأحلام ضايعه بداخل أعماقي
تشترين يا بنت ؟
إذا ما معك قرطاس خذيها بقلبك
واتركي الباقي
شايب وباسط بأحلامه باخر الليل
ينثر حروف وأشعار على بـْـسَاطُه
ينادي بألف موال ويغير أصواته
ويخجل من عيونك لا تذكر اغلاطه
تشترين يا بنت ؟
نصف كيلو حِلم
ونص كيلو عشق
ونص كيلو شِعر
واخلطيها بين ليل وسهر
احفظيها في كاس القهر
واشربي كل عام رشفة ندم
يا بنت ,,
هذي وصفة العاشق
اذا يبي يمشي معك في دروب العشق
وخانته القدم
قلتلك ,,
الليل سوق وبضاعته أحلام
جتني بـِنيّة بتالي الليل سهرانه
قالت أبشتري ياعم
كل هالألم في بضاعتك
إبكم ؟
بـِنيّه وغلبانه
مغدوره من قسوة العشق
ومعذوره تدور على الألم والهم
يمكن تبي تنسى
بتملا قلبها حزن يمكن قلبها يقسى
قلت : يا بنتي توك صغيره
تو المويه في عروقك ما غدت دم
بدري يا بنيـّه على كاسة السّم
ردت وقالت :
آآآآآه يا عم
ليتني لحقت أيامك
شِفت سـُـوقك
وشفت العشق يسبح مع عروقك
وشفت الشوق
أتخيله طوق تزين به شَعري
آآآآه ياعم
ليه ما جيتني بدري
مدري هو حظي غدر بي
والا الغدر مكتوب على تراب دربي
أبسألك ,,
تبيعني غَــدْر ؟
حبيبي باعني لين قلت يكفي
وحملت من غدر العشق
حتى انكسر كتفي
قلـِّب في بضاعتك زين
يمكن تلاقيه بين الرمش والعين
حبيبي دايم يقول
احطك بين رمشي وعيني
ثم تركني على باب الاحلام
عشرين عام
وانا انتظر انه يجيني
أبنشدك يا عم
كيف ينام الغدر في عيون المحبين
ما نشوفه ,,
ليه ننسى الوجود بلمسة كفوفه
ليه أخذني لأبعد أحلامي
و رماني في دروب الحنين
وللحين ,,
تناديني طيوفه
ليه ياعم
ينزف العشق فيني آنين
وهو ما يسمع ؟
خذ ما بقى بالعمر ياعم
وخليه يرجع
دور في بضاعتك يا عم
عن دوا يرجِّعك ليَّ شباب
كذاب عمري اللي مشيته
وكل من عشقني كان كذاب
الحب في عيونك
وفي عيونك الهوى غلاب
قول يا عم أحبِّـك
وانسى الزمن والعمر
وأنسى سنين العذاب
والله اشوفك حيل جذاب
شايب وشايل عشق الشباب
تبيع أحلام
والواقع في سوق حلمك صواب
لبِّيه يا حلم يجمعنا
خلَّني في سوق أحلامك سراب
هات ايدينك في ايديني
وبِـعني في سوق ليلك
بس ,, اشتريني
يا ويل ويلك ,,
لو بعتني لواحد شباب
يا بنت هذا الليل سوق
وبضاعته أحلام
اسمحيلي ..
ألملم بضاعتي وامشي
مره أدوس حلمي
ومره ادوس رمشي
خسران يا بنت
بيّاع الغرام
مادام حبيبه صغير
و بضاعته أوهام
.
.
